Neyðarlegt

Við fórum í óvissuferð í dag með stelpurnar. Ævintýraflokkar eru æðislegir - allt svo afslappað og fjölbreytt. Við fórum að skoða Hraunfossa og Barnafoss, hellinn Víðgelmi, þar sem við borðuðum nestið okkar og svo fórum við í sund í Húsafelli. Við sátum þarna umkringdar útlendingum, við foringjarnir og svo stelpurnar. Loftdýnan sem er fyrir utan sundlaugina hafði meira aðdráttarafl en sjálf laugin þannig að flestar voru farnar upp úr áður en við rákum þær upp úr. Þar sem það eru aðeins 5 sturtur í sturtuklefanum sendum við restina af börnunum á undan okkur og þar með vorum við Sólveig síðastar upp úr pottinum.

Þar sem öll börnin voru farin fórum við að ræða mikilvæg málefni - sumt bara í venjulegri tónhæð en annað í hálfum hljóðum. Við héldum að við værum umkringdar útlendingum - höfðum heyrt í fólkinu í kringum okkur tala dönsku og þýsku. Við vorum bara þarna að ræða merkileg málefni og allt í einu er gripið fram í okkur: "Svona á ekki að vera að ræða í sundi, stelpur!!" Við vorum svo vissar um að við værum einu íslenskumælandi fólkið í pottinum að við pældum bara ekkert í því.  En ég get þrátt fyrir það fullvissað ykkur um það að ekkert krassandi var í raun og veru sagt upphátt. Það sem var svo merkilegt var hvíslaði í eyra Sólveigar og ekki nokkur leið að maðurinn hafi heyrt í mér!! Handahreyfingarnar gætu hins vegar hafa komið upp um okkur og svo heyrði hann glefsur af samtalinu - sagðist samt ekki hafa verið að hlusta! Vi' sögðum við hann að við hefðum verið svo vissar um að við værum einu íslenskumælandi fólkið þarna og að við hefðum heyrt hann tala dönsku - og þá var það alveg rétt hjá okkur - hann var að tala við danska ættingja. Nokkuð myndarlegur maður - þrátt fyrir afskiptasemina ;)

brúðkaupið

Brúðkaupið í gær var ekkert smá fallegt!! Augun full af tárum á meðan á athöfninni stóð og gott ef ekki lengur!! Hlín var ekkert smá sæt og Þorgeir alveg ótrúlega myndarlegur. Veislan var mjög fín, góður matur og skemmtilegt fólk - allavega á borðinu okkar. Veislustjórinn var fyndinn - feitabollubrandarar hjá frekar grönnum manni eru samt ekki að gera sig! Við vorum lengi eftir að veislunni lauk formlega en þá var Gleðisveit Guðlaugar að spila. Það var ágætt og var mér boðið í einn dans af áðurnefndum veislustjóra. Við Sólveig vorum eiginlega síðastar út úr veislunni - ásamt fjölskyldum brúðhjónanna. 

Við fengum að fara í gærmorgun rétt um 10-leytið. Við fórum báðar í Kringluna og skoðuðum okkur um. Rúmir tveir tímar fóru í allt sem ég þurfti að gera fyrir brúðkaupið eftir að heim kom: háreyðing, sturta, plokka augabrúnirnar smá, pota í mig augunum, mála mig og klæða. Fór svo til Fiffa og komst að því að ég kann ekki að strauja pils þannig að hann gerði það fyrir mig! Takk Fiffi :* Mætti í kirkjuna á undan brúðinni og þaðan í veisluna.

Fríinu okkar lýkur held ég í kringum kvöldmatinn - án þess þó að ég sé alveg viss. Fer uppeftir bara þegar það hentar. Man ekki einu sinni á hvaða plani ég er, jú, held að ég sé á plani þrjú. Ég ætla að hitta Frikka á eftir og borða með honum. Við vorum eitthvað að spá í að fara í sund en ég veit ekki hvort við nennum því... Á heldur ekki hrein handklæði.. er að fara að vinna í því samt núna. Nærfötin mín voru í þvotti og ég held að þau séu búin..

Hafið það gott - þangað til næst :) 

shortari

Ég fæ ekki eins langt frí og ég gerði ráð fyrir um helgina - það er eitthvað vesen hjá stelpunni sem á að leysa mig af og hún þarf víst að fara heim á laugardagskvöldinu. Þá er ekkert annað í stöðunni fyrir mig en að mæta hingað uppeftir um nóttina bara. Það samt eiginlega skemmir soldið plönin mín :-/ en það verður bara að hafa það - reyni að láta þetta hafa sem minnst áhrif ;) 

Af hverju getur fólk ekki bara spurð eða beðið um hlutina í stað þess að fara í kringum þá eins og köttur í kringum heitan graut? Ég þoli ekki þegar fólk vill eitthvað en getur ekki sagt það heldur ýjar að því þangað til maður gefst upp á vandræðaganginum og bíður þeim það sem þau eru að biðja um!!

Ég kveikti á tölvunni minni í morgun og kíkti á msn-ið og fannst frekar skrítið að sjá Jón Bjarna (vin hans Fiffa) á msn og hvað þá að hann væri merktur vinnunni því ég var svo viss um að það væri laugardagur í dag!! 

Ég er að hugsa um að leggja mig smástund.. ég er nefnilega á næturvakt í nótt og fæ ekki útsof í fyrramálið því það er skiptidagur. Þarf að vakna og þrífa eins og allir hinir kl. 8 í fyrramálið :-/ Annar veisludagurinn í röð sem ég er á næturvakt og annað útsofið mitt í röð sem fer fyrir lítið!!  

ónýtur dagur

Viðburðarríkur dagur að baki. Æ ég segi það nú kannski ekki en samt.. gerðist allavega eitthvað smá. Ég skrapp í Borgarnes í annað sinn á þremur dögum og keypti það sem mig vantar fyrir helgina. Hef svo lítinn tíma frá því ég losna heðan og þangað til brúðkaupið byrjar. Tíminn sem ég hef heima fer í háreyðingu, sturtu, fegrunaraðgerðir og kannski að strauja pilsið mitt.. Fer eftir því hvort straujárnseigandinn muni eftir því að hann var búinn að leyfa mér að nota straujárnið sitt - kemur i ljós.. annars mæti ég bara í krumpuðu pilsi :) Hverjum er ekki sama :)

Ég fór sem sagt í Borgarnes til að kaupa:

• skartgripi þar sem ég á eiginlega ekkert í stíl og fann svoleiðis í Kristý.
• maskara þar sem minn er ónýtur
• gloss af því að mig langaði í nýtt
• yfirborðsnaglaþjöl - af því að neglurnar mínar eru ógeð
  
• og síðast en ekki síst kók því ég er alveg að verða búin með lagerinn.. þarf það nú ekkert sérstaklega fyrir laugardaginn neitt en better be safe than sorry :)

Ég elska þessa uppfinningu sem þráðlaust net er. Ef ég hefði ekki netið til að hanga á þá myndi ég eyða öllum fríum í að sofa sem er ekki vinsælt því þá sef ég illa í nóttinni. Ef ég les þá sofna ég oftast og ég sofna alltaf yfir sjónvarpinu. Tölvan mín er sem sagt eini bjargvætturinn minn frá svefninum ógurlega :) 

Ég er samt orðin ofurþreytt og verð sennilega hundleiðinlegur gestur hjá Frikka þarnæstu helgi. En það verður bara að hafa það.

ALMÁTTUGUR MINN!! éG ER EKKI BÚIN AÐ FARA Í STURTU Í DAG!!! Ji minn einasti eini!!! Trúi þessu ekki! Steingleymdi því :-/ Nú er dagurinn ónýtur!! kemst ekki núna.. börnin eru í heita pottinum/sturtu :-/ Drasl í bala!!

draumaprinsinn?

Viðburðarríkur dagur að baki! Fékk heimsókn í dag frá Hlín vinkonu og það var ótrúlega gaman. Gott að hafa einhvern til að tala við - þótt það sé ekki nema tveir og hálfur tími. Í kvöld fór ég svo á slysadeildina á Akranesi með sjúkrabíl. Ég var nú ekkert slösuð heldur var ég að fylgja einu barni þangað. Það gekk mjög vel og stelpan bara hress. Ég var á slysó í næstum því þrjá tíma og missti af bænaherbergi og náttfatapartýi. Ég græt það nú ekkert rosalega, verð að viðurkenna það. 

Sólin hefur heldur betur heilsað upp á okkur undanfarna daga. ég er búin að taka þvílíkan lit og hlakka til að fara í outfittið sem ætlað er brúðkaupinu hennar Hlínar því það fer örugglega mjög vel við brúnan líkama minn :)  

Ég er búin að ætla að blogga í marga daga um eitthvað geðveikt merkilegt en man ekkert hvað það er. Ég kom með þá kenningu um daginn að heilinn í mér væri laus. Ég þurfti eitthvað að hoppa og fannst heilinn skoppast til... Er viss um að hann sé laus inni í hausnum.

Þurý, konan hans Hafsteins formanns Ölversstjórnarinnar, er búin að finna handa mér framtíðarmanninn. Sonur hennar er 15 ára - á leið í 10. bekk og henni finnst alveg tilvalið að ég giftist honum bara. Ég á að berja úr honum gelgjuna - herbergið hans er bleikara en öll bleik stelpuherbergi sem ég hef séð um ævina og hann valdi litinn sjálfur. Ætli hann sé draumaprinsinn? Ég efast nú satt að segja um það..  Hann er enn ekki fundinn.. og leit stendur yfir að honum.. samt engin brjáluð leit - en það má alltaf líta í kringum sig :)

Ég er með geðveikan húmor!! En Írena Rut er ekki sammála mér :) En mér finnst ég ógeðslega fyndin :) 

brunarústir

Sólin heiðraði okkur heldur betur með nærveru sinni í dag!! Ég var í gönguferðarfríi í dag og lét renna í pottinn fyrir mig. Sat þar ein í góðan hálftíma og naut sólarinnar. Guðbjörg ráðskona kom svo til mín og Írena líka.. en hún kom samt ekki ofan í. Sem var kannski eins gott því ísbíllinn mætti á svæðið og hún þurfti að taka á móti ísnum. Við Guðbjörg fengum svo ís í pottinn :) mmmm twister er bestur! Ég var búin í fríinu kl. 3 og fór þá á móti stelpunum í gönguferðinni og mætti þeim á miðri leið og gekk bara til baka með fyrsta hollinu. Við tók tími sólbaða og enn meiri sólbaða.. enda ber ég þess merki að hafa verið mikið í sólinni í dag. Ég er brunnin á nebbanum og í kinnunum, á bringunni og aðeins á öxlunum. Það verður orðið ágætt á morgun því þá tekur við meira sólbað :) 

Ég var með linsur í dag til að fá ekki gleraugnafar.. það er mest nördalegt í heimi - það er nú samt ekkert svo merkilegt.. er alveg með þær stundum.. nema hvað að þegar ég er að taka þær úr rifnar linsan sem er í vinstra auganu og annar helmingur hennar er ENNÞÁ  inni í auganu og böggar mig ekkert lítið!! *pirr* og ég næ henni ekki.. Mig svíður í augað og þetta er ekki gott.

Ljóta verslunarmannahelgi!! Alveg bögg - ég veit ekkert hvað eg á að gera!!  Enda örugglega á því að gera ekki rass í bala!! en það verður bara að koma í ljós... 

Ætla að fara að koma mér í svefninn.. allar stelpurnar löngu sofnaðar.. ég er á næturvakt.. en maður hangir endalaust í tölvunni. En ef ég hefði hana ekki væri ég samt pottþétt enn vakadi - bara með bók í hönd..  

aðhlátursefni

Þvílíkir leiksigrar sem ég vann í gær! Ég hef ekki leikið í leikritum á veislukvöldum síðan 2000 ef frá er talið leikritið þar sem ég stóð uppi á borði í bikiníinu einu fata og ætlaði að synda í tjörninni - en það reyndar átti sér stað alveg 8 sinnum í fyrrasumar. En í gær lék ég í öllum atriðunum, svei mér þá, við mikla kátínu stelpnanna. Þetta var mjög gaman þótt ég vildi helst sleppa við allt svona. En það er ágætt að missa sig alveg í gleðinni eitt og eitt kvöld. 

Ég fór með rútunni í morgun og stoppaði alveg heila þrjá tíma í bænum. Þeir reyndar fóru ekki alveg í súginn - foreldrar Magneu skutluðu mér heim og ég fór í sturtu, henti mygluðu mjólkinni og lagði mig smá yfir Cinderella Story. Mamma kom svo heim og við fórum saman á Kentucky í Skeifunni og vesenuðumst aðeins saman - ég keypti linsur og kók og eitthvað. Það var ótrúlega gott að hitta mömmu - frábært að hún skyldi þurfa að vera í bænum akkúrat í dag :) Mamma skutlaði mér svo á Holtaveginn og þar hitti ég Gulluna mína! Það var æði! Þessi vika verður snilld - vantar bara að Iðunn sé hérna og þá værum við allar sameinaðar síðan í fyrra :)

Lífið hérna er svo takmarkað að ég hef eiginlega bara ekkert að skrifa um. Forstöðukonan sem var hérna í síðasta flokki var æðisleg! Ég er svo ánægð með hana og hvernig hún stjórnaði hlutunum hérna. Hún er kennari og örugglega alveg frábær sem slíkur. Svona langar mig að verða - geðveikur kennari sem virðing er borin fyrir.

Írena Rut kom hlæjandi inn í herbergið mitt og kallaði mig nörda og síðan hló hún ennþá meira þegar hún sá undirhökuna mína.  Hún sagði að ég væri með feita undirhöku!! Það er bara eitthvað alltaf verið að hlæja að mér.. skil ekkert í þessu. Gott að geta skemmt öðrum og hafa þar með einhvern tilgang í þessum heimi :)

Sambúðarslit

Mér finnst vera að mér vegið hér í Ölveri og því fór ég fram á sambúðarslit. Það er sem sagt sambúð mín og Írenu sem ég fór fram á að yrði slitið vegna þess að hún er farin að vera ýkt vond við mig. Hún er það samt ekkert í alvörunni - hún er bara að stríða mér. Sambúðinni var slitið í nótt - hún fór á Akranes í frí og mér leiddist ýkt mikið þegar ég var að fara að sofa. Enginn til að tala við og enginn til að eiga síðasta orðið við. En hún stytti mér stundir með því að senda mér sms rétt áður en við fórum að sofa hvor á sínum staðnum. Ég reyndar svaf í alla nótt sem hefur ekki gerst í fáránlega langan tíma - en ég vil nú ekki skrifa það á að hún var ekki hjá mér. Ég er greinilega bara orðin nógu þreytt núna. Ég dró til baka ósk mína um sambúðarslit og fékk það alveg í gegn... Enda hefði ég sennilega þurft að sofa úti á Axelsverkstæði ef ég hefði í alvöru viljað það. Ég reyndar þarf að sofa niðri í Birkiveri í nótt því ég er á næturvakt og ég veit ekki hvort Írena komi uppeftir í kvöld eða á morgun. En við verðum sameinaðar á ný annað kvöld hvort sem hún kemur uppeftir í kvöld eða á morgun.

Annars gengur bara allt sinn vanagang. Ég er búin að vera alveg viss um það í allan dag að það sé föstudagur en ekki laugardagur og varð mjög glöð þegar ég fattaði að við eigum bara tvo daga eftir af þessum flokki en ekki þrjá eins og ég hélt. Á eftir er náttfatapartý sem verður án efa mjög skemmtilegt. Í kvöld er svo önnur næturvaktin mín í þessum flokki og þær verða vonandi mjög fljótar að sofna. 

Af því að ég get bloggað eins og ég vil núna hef ég akkúrat ekkert merkilegt að segja. Á þriðjudaginn kemur nýr flokkur og það gæti verið að ég þyrfti að fara í bæinn með rútunni og uppeftir aftur. Þá verð ég bíllaus og það er bara eitt af því sem ég kann ekki í Reykjavík. Það er ekkert mál í Keflavík en aðeins meira mál fyrir mig - Keflvíkinginn - í borginni. 

Mamma og pabbi, ég veit þið lesið þetta. Þegar þið farið heim til mín og sækið póstinn minn, viljið þið þá henda mjólkinni úr ísskápnum? Ég nefnilega steingleymdi því áður en ég fór :-/ Póstkassalykillinn er í bókahillunni - næstefstu eða efstu hillunni :)  

Ætla að láta þetta gott heita og drekka kókið mitt :) 

nútímavæðing

Við erum loksins orðnar nettengdar hérna í Ölveri. Það hefur tekið tímann sinn að fá þetta í gagnið – forstöðukonan okkar núna sá til þess að þetta yrði gert. Nettengingin virkar samt ekki í þessum skrifuðu orðum en því verður kippt í liðinn von bráðar eða skömmu síðar.

 Flokkurinn gengur ágætlega, það eru 33 stelpur hérna, tvö börn forstöðukonu og tveir matvinnungar. Mér líkar það reyndar mjög vel. Það er ótrúlega gaman að sjá 13 og 15 ára stelpur sem voru fyrsta sumarið mitt 1999 koma hingað og vera orðnar starfsmenn. Mér finnst það frábært. Önnur þeirra var að verða 6 ára þegar hún kom fyrst og hún er matvinnungur núna og stendur sig frábærlega.

Þetta net er dintóttara en andskotinn, svei mér þá. Það dettur inn þegar því hentar og er bara með endalaus leiðindi. Ég komst inn í svona fimm mínútur í hádeginu en síðan ekki söguna meir. Alveg böggandi dót. Náði náttúrulega ekki að henda inn hluta af þessari færslu á þessum mínútum sem ég datt inn í hádeginu. Vona að þetta gerist bráðum. Það er gaman að geta bloggað án þess að þurfa að keyra í tíu mínútur til þess. Ekki það að ég hafi margt að segja en hey – maður verður að láta heiminn vita að maður sé á lífi.

Hausinn er búinn að vera að drepa mig bæði í gær og í dag. Í gær var ég svo veik að ég ældi og var þar af leiðandi send inn að sofa í staðinn fyrir að fara í gönguferð. Ég vil ekki vera með meira vesen og ætla að leggja mig á eftir. Ég er í fríi núna og ætla að nota hluta af því í svefn. Ég sef enn mjög illa á næturnar og ætla að reyna að halda mér vakandi á daginn til að athuga hvort ég sofi betur, en dagurinn í dag er undantekningin, útaf mígreninu. 

Annars hef ég fátt annað að segja í bili. Hér gerist afskaplega fátt annað en daglega rútínan. Flestir vinir mínir eru sumarbúðavanir og kunna þetta allt saman og því nenni ég ekki að segja hvernig dagurinn er hérna. Ekki núna allavega.

Hafið það gott - þangað til næst :) 

leavin' yet again

"Þú ert stærri en þú heldur og getur alveg tekist á við það sem þig langar. Hættu að velta þér upp úr orðnum hlut og farðu að horfa fram á við, þessi vísa er aldrei of oft kveðin."

Svona hljómar stjörnuspáin í Blaðinu í dag fyrir bogmanninn. Ég les stjörnuspárnar þegar ég kemst í blöðin en annars er mér alveg sama um þetta. Þetta getur samt oft átt alveg merkilega vel við - enda kannski til þess gert að höfða til sem flestra. Ég veit hvað það er sem mig langar en ég veit líka hvað er orðinn hlutur og það er tími til kominn til að  horfa fram á veginn og hætta að svekkja mig á því sem ég get ekki breytt. 

Þá er spekingslegi hlutinn kominn :)  Ég skrapp til Keflavíkur í gær til að hitta familíuna því ég hitti þau ekki í tæpar fjórar vikur. Það hefur nú alveg liðið lengri tími á milli þess sem ég hitti þau en mér finnst ég bara vera að missa af svo miklu hjá honum Benóný ef ég hitti hann ekki reglulega. Þess vegna ákvað ég að skella mér til þeirra - svo hann gleymi nú ekki uppáhaldsfrænku sinni! Við systurnar fórum í sólbað á pallinum hjá henni og Benóný var úti með okkur. Það var ótrúlega notalegt og gott. Ég var nýkomin úr sundi og brann aðeins á öxlunum en ekkert alvarlega. Ég borðaði heima hjá mömmu og Jóa og horfði á úrslitaleik HM og fór svo til Jóhönnu. Þar fékk ég gefins buxur í staðinn fyrir lánið á tjaldinu. Og að lokum fór ég í vinnuna til pabba og var hjá honum í smá tíma. Hitti þar gamlan bekkjarbróður. Það var mjög gaman að heimsækja pabbann minn í vinnuna :)

Ég beilaði á djamminu á laugardagskvöldið :-/ Ég veit, það er ýkt lélegt en ég var bara ekki í neinum fíling fyrir djamm. Horfði bara á sjónvarpið og spjallaði við fólk á msn. Spennandi - ég veit.

Ég er búin að vera á fullu að þvo og pakka í dag og það hefur bara gengið ótrúlega vel. Ég geri mér svo innilega enga grein fyrir því hversu mikið af fötum ég þarf að taka með mér þannig að ég er pottþétt að taka allt of mikið. En þar sem þetta eru tæpar fjórar vikur þá kem ég örugglega til með að nota bróðurpartinn af þessu. Ég fer uppeftir á morgun um 2-leytið. Þarf að vera komin á undan rútunni. Mér tókst það samt ekki síðast en það var allt í lagi - ég byrjaði í fríi um leið og ég kom :) Veit ekki alveg á hvaða plan ég verð sett á morgun. Enda kemur það bara í ljós...

Dagný kemur heim eftir 32 daga! Og sumrinu mínu lýkur eftir 36 daga! Það er ekkert langt eftir. Ég vona bara að þetta líði hratt.  

Hendi kannski inn einni færslu áður en ég fer á morgun.. annars reyni ég að kíkja við tækifæri á Mótel Venus...

Eitt enn: Ég er búin að fá 54  heimsóknir í dag og þrjú komment. Frá því ég byrjaði að blogga á þessari síðu er ég búin að fá 7 eða 9 heimsóknir í gestabókina. Hvernig væri nú að kvitta fyrir komuna og gleðja mitt litla hjarta í leiðinni? :)