Sambúðarslit

Mér finnst vera að mér vegið hér í Ölveri og því fór ég fram á sambúðarslit. Það er sem sagt sambúð mín og Írenu sem ég fór fram á að yrði slitið vegna þess að hún er farin að vera ýkt vond við mig. Hún er það samt ekkert í alvörunni - hún er bara að stríða mér. Sambúðinni var slitið í nótt - hún fór á Akranes í frí og mér leiddist ýkt mikið þegar ég var að fara að sofa. Enginn til að tala við og enginn til að eiga síðasta orðið við. En hún stytti mér stundir með því að senda mér sms rétt áður en við fórum að sofa hvor á sínum staðnum. Ég reyndar svaf í alla nótt sem hefur ekki gerst í fáránlega langan tíma - en ég vil nú ekki skrifa það á að hún var ekki hjá mér. Ég er greinilega bara orðin nógu þreytt núna. Ég dró til baka ósk mína um sambúðarslit og fékk það alveg í gegn... Enda hefði ég sennilega þurft að sofa úti á Axelsverkstæði ef ég hefði í alvöru viljað það. Ég reyndar þarf að sofa niðri í Birkiveri í nótt því ég er á næturvakt og ég veit ekki hvort Írena komi uppeftir í kvöld eða á morgun. En við verðum sameinaðar á ný annað kvöld hvort sem hún kemur uppeftir í kvöld eða á morgun.

Annars gengur bara allt sinn vanagang. Ég er búin að vera alveg viss um það í allan dag að það sé föstudagur en ekki laugardagur og varð mjög glöð þegar ég fattaði að við eigum bara tvo daga eftir af þessum flokki en ekki þrjá eins og ég hélt. Á eftir er náttfatapartý sem verður án efa mjög skemmtilegt. Í kvöld er svo önnur næturvaktin mín í þessum flokki og þær verða vonandi mjög fljótar að sofna. 

Af því að ég get bloggað eins og ég vil núna hef ég akkúrat ekkert merkilegt að segja. Á þriðjudaginn kemur nýr flokkur og það gæti verið að ég þyrfti að fara í bæinn með rútunni og uppeftir aftur. Þá verð ég bíllaus og það er bara eitt af því sem ég kann ekki í Reykjavík. Það er ekkert mál í Keflavík en aðeins meira mál fyrir mig - Keflvíkinginn - í borginni. 

Mamma og pabbi, ég veit þið lesið þetta. Þegar þið farið heim til mín og sækið póstinn minn, viljið þið þá henda mjólkinni úr ísskápnum? Ég nefnilega steingleymdi því áður en ég fór :-/ Póstkassalykillinn er í bókahillunni - næstefstu eða efstu hillunni :)  

Ætla að láta þetta gott heita og drekka kókið mitt :) 

nútímavæðing

Við erum loksins orðnar nettengdar hérna í Ölveri. Það hefur tekið tímann sinn að fá þetta í gagnið – forstöðukonan okkar núna sá til þess að þetta yrði gert. Nettengingin virkar samt ekki í þessum skrifuðu orðum en því verður kippt í liðinn von bráðar eða skömmu síðar.

 Flokkurinn gengur ágætlega, það eru 33 stelpur hérna, tvö börn forstöðukonu og tveir matvinnungar. Mér líkar það reyndar mjög vel. Það er ótrúlega gaman að sjá 13 og 15 ára stelpur sem voru fyrsta sumarið mitt 1999 koma hingað og vera orðnar starfsmenn. Mér finnst það frábært. Önnur þeirra var að verða 6 ára þegar hún kom fyrst og hún er matvinnungur núna og stendur sig frábærlega.

Þetta net er dintóttara en andskotinn, svei mér þá. Það dettur inn þegar því hentar og er bara með endalaus leiðindi. Ég komst inn í svona fimm mínútur í hádeginu en síðan ekki söguna meir. Alveg böggandi dót. Náði náttúrulega ekki að henda inn hluta af þessari færslu á þessum mínútum sem ég datt inn í hádeginu. Vona að þetta gerist bráðum. Það er gaman að geta bloggað án þess að þurfa að keyra í tíu mínútur til þess. Ekki það að ég hafi margt að segja en hey – maður verður að láta heiminn vita að maður sé á lífi.

Hausinn er búinn að vera að drepa mig bæði í gær og í dag. Í gær var ég svo veik að ég ældi og var þar af leiðandi send inn að sofa í staðinn fyrir að fara í gönguferð. Ég vil ekki vera með meira vesen og ætla að leggja mig á eftir. Ég er í fríi núna og ætla að nota hluta af því í svefn. Ég sef enn mjög illa á næturnar og ætla að reyna að halda mér vakandi á daginn til að athuga hvort ég sofi betur, en dagurinn í dag er undantekningin, útaf mígreninu. 

Annars hef ég fátt annað að segja í bili. Hér gerist afskaplega fátt annað en daglega rútínan. Flestir vinir mínir eru sumarbúðavanir og kunna þetta allt saman og því nenni ég ekki að segja hvernig dagurinn er hérna. Ekki núna allavega.

Hafið það gott - þangað til næst :) 

leavin' yet again

"Þú ert stærri en þú heldur og getur alveg tekist á við það sem þig langar. Hættu að velta þér upp úr orðnum hlut og farðu að horfa fram á við, þessi vísa er aldrei of oft kveðin."

Svona hljómar stjörnuspáin í Blaðinu í dag fyrir bogmanninn. Ég les stjörnuspárnar þegar ég kemst í blöðin en annars er mér alveg sama um þetta. Þetta getur samt oft átt alveg merkilega vel við - enda kannski til þess gert að höfða til sem flestra. Ég veit hvað það er sem mig langar en ég veit líka hvað er orðinn hlutur og það er tími til kominn til að  horfa fram á veginn og hætta að svekkja mig á því sem ég get ekki breytt. 

Þá er spekingslegi hlutinn kominn :)  Ég skrapp til Keflavíkur í gær til að hitta familíuna því ég hitti þau ekki í tæpar fjórar vikur. Það hefur nú alveg liðið lengri tími á milli þess sem ég hitti þau en mér finnst ég bara vera að missa af svo miklu hjá honum Benóný ef ég hitti hann ekki reglulega. Þess vegna ákvað ég að skella mér til þeirra - svo hann gleymi nú ekki uppáhaldsfrænku sinni! Við systurnar fórum í sólbað á pallinum hjá henni og Benóný var úti með okkur. Það var ótrúlega notalegt og gott. Ég var nýkomin úr sundi og brann aðeins á öxlunum en ekkert alvarlega. Ég borðaði heima hjá mömmu og Jóa og horfði á úrslitaleik HM og fór svo til Jóhönnu. Þar fékk ég gefins buxur í staðinn fyrir lánið á tjaldinu. Og að lokum fór ég í vinnuna til pabba og var hjá honum í smá tíma. Hitti þar gamlan bekkjarbróður. Það var mjög gaman að heimsækja pabbann minn í vinnuna :)

Ég beilaði á djamminu á laugardagskvöldið :-/ Ég veit, það er ýkt lélegt en ég var bara ekki í neinum fíling fyrir djamm. Horfði bara á sjónvarpið og spjallaði við fólk á msn. Spennandi - ég veit.

Ég er búin að vera á fullu að þvo og pakka í dag og það hefur bara gengið ótrúlega vel. Ég geri mér svo innilega enga grein fyrir því hversu mikið af fötum ég þarf að taka með mér þannig að ég er pottþétt að taka allt of mikið. En þar sem þetta eru tæpar fjórar vikur þá kem ég örugglega til með að nota bróðurpartinn af þessu. Ég fer uppeftir á morgun um 2-leytið. Þarf að vera komin á undan rútunni. Mér tókst það samt ekki síðast en það var allt í lagi - ég byrjaði í fríi um leið og ég kom :) Veit ekki alveg á hvaða plan ég verð sett á morgun. Enda kemur það bara í ljós...

Dagný kemur heim eftir 32 daga! Og sumrinu mínu lýkur eftir 36 daga! Það er ekkert langt eftir. Ég vona bara að þetta líði hratt.  

Hendi kannski inn einni færslu áður en ég fer á morgun.. annars reyni ég að kíkja við tækifæri á Mótel Venus...

Eitt enn: Ég er búin að fá 54  heimsóknir í dag og þrjú komment. Frá því ég byrjaði að blogga á þessari síðu er ég búin að fá 7 eða 9 heimsóknir í gestabókina. Hvernig væri nú að kvitta fyrir komuna og gleðja mitt litla hjarta í leiðinni? :) 

 

sleepless

Fríin mín fara alltaf í svo ótrúlega mikið rugl - ég geri ekki rassgat allan daginn og hangi á netinu langt fram eftir nóttu. Ég hangi bara heima í einhverju móki og vil ekkert gera. Þetta er ömurlegt. Ég hlakka til þegar skólinn byrjar - þá er að minnsta kosti einhver rútína í gangi: skólinn, vinna, borða og sofa. Mig langar svo að fara eitthvað, gera eitthvað, komast burtu héðan. Það hjálpar heldur ekki til að ég sef eiginlega ekki neitt. Eða jú jú, ég sef alveg en ég vakna endalaust á nóttunni. Síðustu nótt vaknaði ég örugglega fimm sinnum en núna í nótt bara tvisvar - en var svo vöknuð alveg fyrir 10. Það er bara orðin einhver regla að ég vakna alltaf um 5-leytið á morgnana og svo nokkrum sinnum eftir það. Ég er orðin hrikalega þreytt á þessu. 

Jóhanna er að reyna að fá mig á Lopapeysuballið í kvöld. Hún er nú samt að reyna að fá tjaldið mitt lánað sem ég má svo gista í - með henni og Geira ef ég kem. Ég er að spá i að fara út í Ríki á eftir ef ég skyldi nú vilja fara..  Oh nenni ekki að ákveða svona!!!!

Ég varð fyrir svo hrikalega miklum vonbrigðum í gær! Ég fór á American Style í hádeginu í gær með Rakel og pantaði mér bara minn mat. Gellan mundi eftir mér frá kvöldinu áður. Ég er með alvarlegt ofnæmi fyrir tómatsósu og læt því alltaf setja bbq-sósu á hamborgarann minn í staðinn fyrir tómatsósuna (kaupi sko alltaf barnaborgara). Það hefur eitthvað ekki verið nógu skýrt því þegar hamborgarinn kemur var hann með tómatsósu!  Ég fer og skila honum og gellan voða sorry en þegar ég fæ nýjan hamborgara er hann svo hrár að mér var ómögulegt að borða hann. Borðaði bara smá af honum og svo bara franskar. Ég nennti ekki að skila honum aftur... En vonbrigðin voru ansi mikil. 

Dagný hringdi í mig í gær. Það var ótrúlega gaman að heyra í henni :)  

Núna er höfuðverkurinn um hvað gera skuli um verslunarmannahelgina í algleymingi! Ég veit þetta er soldið snemmt að hafa áhyggjur af því en samt ekki þar sem ég verð í útlegð frá þriðjudeginum næsta og fram að föstudeginum fyrir verslunarmannahelgina. Það verða allir einhvers staðar langt í burtu og flestir í útlöndum. Ég held að mamma og pabbi og Ásta systir og hennar fjölskylda ætli í útilegu og mér er boðið með. Svo var ég að tala við Frikka og Neistaflug heillar mjög mikið. Og þá hefði ég gistingu í húsi :)  Ég ætla samt að hugsa þetta aðeins betur.

 Þið fáið eina mynd af litlanum minum svona í lokin.

pabbastelpan

Ég fór út að ganga með litla prinsinn minn í gær. Veðrið í Keflavík er alltaf svo dásamlegt - það var grenjandi rigning en annars fínt. Ég var alveg rennandi blaut en hann var bara kátur í vagninum sínum. Ég ætla að sýna ykkur mynd af honum síðan hann var á Spáni í maí. Hann er ofursætur þetta barn. Jóhönnu finnst hann svo ótrúlega líkur Jóa bróður - veit ekki alveg með það samt. 

Við systurnar fórum að versla í gær. Það gekk svona líka ljómandi vel - ég gekk út með tvennar buxur og hlírabol sem kostaði allt saman um 6500 kall. Ásta keypti kjól. MAgnó er ágætis búð. Mæli með henni.

Kannski fer ég og kaupi mér nýja tölvu í dag. Ef ég fer nógu snemma í bæinn þá ætla ég að fara og kaupa draumagripinn. Ég er búin að finna nafn á hana og allt saman. Hún verður nefnd eftir kynþokkafyllsta manni þessa lands og þótt víðar væri leitað. Ég læt ykkur vita þegar hún hefur verið nefnd formlega.  Oh hvað það verður gaman að eiga nýja tölvu.

Smurstöðin min hérna í Keflavík brann um daginn og þá var bara eftir ein smurstöð í bænum. Kallinn sem á hana hækkaði verðið á smurningunni upp úr öllu valdi þegar hann var orðinn einn um þennan bisness í Keflavík. Pabba mínum líkar það sko ekki og fór þess vegna með bílinn minn í morgun suður í Sandgerðí til að láta smyrja hann þar. Núna er bíllinn minn smurður og fínn. Takk pabbi minn. Ég fékk líka hádegismat i rúmið - eða ekki alveg í rúmið heldur inn í herbergið hans Jóa þar sem ég var að horfa á nágranna. Ég er svo mikil dekurrófa hjá honum pabba mínum :) Líka alveg hjá mömmu en ekki alveg eins mikið.

Ég er að deyja í hausnum mínum - en það er svo sem ekkert nýtt. Það lagast einhvern tímann. 

Hlín á afmæli í dag :) Til hamingju með það :) 

____________________________________________________

Viðbætur:

Tölvan var að sjálfsögðu ekki til en ég pantaði mér eitt stykki og kem til með að fá hana eftir 2 -3 vikur :) eins og Dagný myndi segia: Oh the joy :) Það verður gaman :) 

fríið mitt

Einn dagur af fríinu mínu búinn og hann hefur farið í akkúrat ekki neitt. Ég kláraði að þrífa herbergið mitt í gærmorgun og fór svo áður en börnin fóru. Var komin í bæinn um hálfellefu og kom aðeins við heima til að pakka mér niður í minni tösku. Var svo komin heim til mömmu og pabba fyrir hádegið og vakti bróður minn. Ég reyndar gleymdi snyrtitöskunni minni heima og þar eru lyfin mín svo ég varð að fara í bæinn í gærkvöldi til að ná í hana. Ég nýtti þá tækifærið og fór í bíó í leiðinni. Það var ágætt án þess að ég segi eitthvað meira um það hérna :) Fór svo bara aftur heim til mömmu og pabba og er þar ennþá.

Planið er að fara á útsölu í kvöld í Mangó með Ástu systur og fara svo heim til mín á morgun. Þarf alvarlega að fara að þvo fötin mín - er alveg orðin fatalaus eftir Ölver. En ég hef nægan tíma til að þvo og chilla og hanga og gera ekkert.

Samstarfsfólkið mitt í Ölveri fer næstum allt heim eftir þennan flokk þannig að ég hitti þær ekkert aftur. Tvær þeirra eru að fara að til Bandaríkjanna sem skiptinemar í haust þannig að ég hitti þær ekkert í lengri tíma.  ekki það að ég hitti þær eitthvað mikið en það kemur nú alveg fyrir að maður rekist á þær á förnum vegi.

Systir mín var að hringja og biðja mig um að taka frænda minn í smá gönguferð. Það er að sjálfsögðu ekkert nema sjálfsagt en þarf samt að fara í sturtu áður en ég geti farið út úr húsi :)

Mér finnst vond lykt ekki góð!!  

 

Bíllinn minn

Ég gleymdi að segja ykkur frá því hvernig bílnum minum líður eftir áreksturinn. Það var alveg hægt að keyra hann - húddið aðeins beyglað og brettið líka og ljósið öðrum megin brotið, held það hafi ekkert verið neitt meira. Ég fór með bílinn til Keflavíkur því pabbi minn er mesti snillingur í heimi og getur reddað öllu saman - alveg sama hvað það er. Hann fór á stúfana til að leita að húddi á bílinn minn og keyrði um allan Reykjanesskagann til að finna bíl sem er eins og minn. Það tókst og hann fann bíl sem átti held ég bara að fara á haugana. Húddið á honum leit mjög vel út og pabbi tók það af og setti á minn bíl. Brettið gat pabbi rétt með því að setja í sjóðandi heitt bað - vegna þess að það er úr plasti þá réttist það í hitanum og hann fekk held ég líka ljósastæðið úr hinum bílnum og setti í minn. Þessi viðgerð kostaði mig nánast engan pening og pabbi minn gat gert við þetta allt saman. Það tók miklu styttri tíma heldur en ég bjóst við. Mér finnst bíllinn minn flottur - hann er tvílitur, rauður með sægrænu (er það ekki pabbi) húddi :) Takk elsku pabbi :) Ég er búin að taka myndir af honum.. en það er alltaf þetta vandamál að kunna ekki að setja myndirnar á netið... :-/ Er búin að fatta hvernig ég get gert það.. en þið þurfið bara að bíða í nokkra daga... :)

Lífið gengur annars bara sinn vanagang hér í Ölveri. Uppfrá eru 40 hressar stelpur á aldrinum 10-12 ára. Sami aldur og er í ævintýraflokki en þetta er bara venjulegur flokkur. Í þessum hópi eru margir snillingar sem gaman er að tala við.  Ég er með ágætis bænaherbergi, svona þegar þær áttuðu sig á því að það er ég sem ræð, ekki þær. 

Eg er eitthvað voða andlaus og líður ekkert allt of vel. Það er of margt í lífinu ekki eins og ég vil hafa það. En því miður er ég ekki einráð um hvernig allt fer!!  Af hverju þurfa að vera til vondar tilfinningar??

Brottför nr.2

Þá er komið að annarri brottförinni fyrir þetta sumarið :) Ég er næstum búin að pakka niður.. öllu nema tölvunni held ég bara. Þetta frí var bara alveg ágætt. Ég hitti næstum alla þá sem ég ætlaði mér að hitta plús nokkra auka. Þeir sem ég náði ekki að hitta núna fá kannski að njóta nærveru minnar í næsta fríi sem verður einmitt eftir eina viku :) Ég hlakka til að takast á við næsta flokk - þær eru 10 - 12 ára og það verður án efa rosalega gaman. Keflvíkingurinn (og þar af leiðandi snillingurinn) sr. Íris Kristjánsdóttir verður forstöðukona og ég hlakka ekkert lítið til að vinna undir hennar stjórn! Held alveg að hún sé jafnæðisleg og systir hennar, hún Systa :) 

Ég hef verið að hugsa svo ótrúlega mikið undanfarna daga og langar að blogga um það en ég er ekki viss um að ég nái að koma því fallega frá mér. Ég kannski reyni að sjóða eitthvað saman um þetta þessa viku sem ég verð uppfrá núna og birti það þegar ég kem í bæinn.  

Reykingarnar hjá nágrönnum mínum hafa bara aukist undanfarna daga. Núna er ástandið svo slæmt að ég varð að loka báðum gluggunum sem snúa út í garð og opna útidyrahurðina til að fá smá ferskt loft inn til mín áður en ég fer. Áðan var ég gjörsamlega að kafna!! Er orðin aum í höfðinu og allt saman, frekar böggandi og á eftir að keyra í svo mikilli sól... En ég lifi það af!

 Ef þið haldið að þið saknið mín ótrúlega mikið þá er ég vissulega alltaf með símann einhvers staðar nálægt mér og auðvitað er alltaf velkomið að droppa í heimsókn :) En annars kveð ég bara og blogga í síðasta lagi aftur eftir viku.. sé til hvort ég nenni á Mótel Venus í vikunni :)

Adios :) 

stutt og flegið

Ég fór í Mangó í gær og verslaði aðeins af fötum, eiginlega bara boli. Tveir þeirra eru alveg eins, annar er rauður og svartu og hinn er blár og svo tveir hlírabolir. Annar þeirra er bleikur! með einhverju svona skrautadóti og hinn er bara plain hvítur, síður. Bolirnir sem eru alveg eins eru svo flottir, flegnir og með smá opið í bakið! Ég er svo glöð yfir því að geta loksins gengið í flegnum bolum, finnst það ekkert smá æðislegt! Ég er nú eiginlega bara orðin soldið mikil skutla - eða nei eiginlega ekki en ég má alveg halda það ;) Fór í rauða og svarta bolnum í veisluna til Sólveigar og var í stuttu gallapilsi við. Er svo ánægð með þetta ;) Það var alveg tekið eftir skorunni minni.. samt bara vinir mínir en það var samt gaman :)

Ég fór á tattoostofuna Húðflúr og götun í dag til Hlyns frænda og er ótrúlega ánægð með engilinn minn. Þetta var samt smá tilraunastarfsemi því það var svo lítið hold til að vinna með inni í honum. Inni í vængjunum var nefnilega einhver smá grá skygging og bara einhver smá lína sem ekkert var sprautuð. En Mike setti samt bláan lit í vængina og við vonum bara að hann leki ekki allur út. Svo setti hann lit í engilinn og hárið. Það var víst minna mál. Og svona til að allt tattooið liti sem nýjast út fór hann aftur ofan í stafina W.W.J.D? Mike er ekkert smá fær og Hlynur frændi líka. Takk Hlynur og Mike :) Ef ég fatta einhvern tímann hvernig á að færa myndir úr símanum mínum yfir í tölvuna skal ég sýna ykkur myndir af listaverkinu mínu flotta :)

Ég sit hérna heima hjá mér í rúminu minu og er gjörsamlega að kafna úr reykingastybbu. Ég er samt búin að loka glugganum fyrir ofan rúmið mitt. Verð að standa upp til að loka stofuglugganum. Nenni því samt ekki núna.. geri það bara bráðum. Þetta er samt ekkert smá ógeðslegt!! Ég er reyklaus, lyktin fer mjög i hausinn á mér og mér á ekki að þurfa að líða eins og ég sé við hliðina á einhverjum sem er að reykja!  Ógeð!! OJ!!

Það er svo gaman að hitta fólk! Hitti Hlín í dag og fór með henni að versla og svo sóttu hún og Þorgeir mig og við fórum í veisluna. Þar voru fleiri vinir mínir og það var ótrúlega gaman. Ég er ekkert að segja að sumarbúðafólkið mitt sé ekki fólk en að hitta annað fólk er dásamlegt :) Þótt ég hlakki til að fara uppeftir og hitta Írenu og hinar aftur.

Hafið það gott :) 

Good times

Ég var að fara í gegnum kassa af gömlu dóti - minnka aðeins umfangið svo hægt  sé að ganga frá dótinu út í skúr. Ég fann gamlar skólamöppur frá árum mínum í FS. Hafði mjög gaman af að skoða þetta, var ekkert smá skipulögð á þessum árum - eða glósurnar mínar voru það allavega. Litríkar og flottar. Það er svona þegar maður þarf á því að halda að rembast við að halda sér vakandi. Min lausn hefur verið að glósa það sem kennararnir segja.. ekki það að það sitji eitthvað eftir.. en hey.. get allavega lesið tímana eftir á :)

Ég fann líka ferðaáætlunina okkar til Eþíópíu árið 2000, sprautuáætlunin okkar og annað svona merkilegt sem við þurftum að vita fyrir ferðina. Ég fann líka ferðaáætlunina inn í landið, allt voðalega vel skipulagt og flott. Inni í áætluninni var samt ekki að týna töskunum hennar Þóru í rúma þrjá daga!! Það var hræðilegt!! En ferðin var samt æðislegt - alveg frá upphafi til enda. Engin smá upplifun! 

Alltaf gaman að fara í gegnum kassa - þótt það hafi tekið ansi langan tíma gera það sem mamma bað um.

Núna er ég að fara til Hlyns frænda á tattoostofuna til að láta sprauta í engilinn minn. Veit ekkert hvað verður gert við hann en það kemur bara í ljos.. Veit heldur ekki hvað mig langar til að láta gera við hann. Svo fer ég í bæinn og fer með Hlín að versla. Svo er bara veisla hjá Sólveigu í kvöld.

Þangað til næst :)